Dick King

Die geskiedenis van amper alles Suid-Afrikaans.

Richard Philip (Dick) King was 'n Natalse pionier (Cam, Gloucestershire 28 November 1813 - Isipingo 10 November 1871) en die seun van die 1820-Setlaar Philip King. Hy het in 1828 na Natal vertrek, waar hy wadrywer vir kaptein Gardiner en eerwaarde F Owen geword het.

Ná die moord op Piet Retief in Februarie 1838 het hy oor 'n afstand van ongeveer 190 km gestap om die Voortrekkerlaers te waarsku teen die naderende Zoeloes. Hy het slegs die laer van Gert Maritz betyds bereik.