28 November
Die geskiedenis van amper alles Suid-Afrikaans.
28 November is die 332ste dag van die jaar in die Gregoriaanse kalender (333ste in skrikkeljare). Daar volg nog 33 dae in die res van die jaar.
Gebeurtenisse
- 1860 - Die stigter van Ermelo, Frans Lion Cachet, word in die NG Kerk as predikant gelegitimeer.
- 1885 - Die spoorlyn tussen Kimberley en Kaapstad word geopen.
- 1899 - Die Slag van Modderrivier, waar Lord Methuen aan Britse kant die bevel voer, vind plaas.
- 1901 - Die gesamentlike magte van Malan, Maritz, Lategan en Van Deventer val ‘n perdedepot by Tontelboskolk naby Calvinia aan en buit 300 diere, maar die WP Mounted Rifles en ongeveer 175 bruin mense, die Bushmanland Borderers, keer dat die plek ingeneem word.
- 1904 - Emily Chinea word die eerste vrou in Suid-Afrika wat tereggestel word vir die moord op haar man.
- 1973 - Arabiese leiers beëindig hul spitsberaad in Algerië met die aankondiging van ‘n olieboikot teen Portugal, Rhodesië en Suid-Afrika.
- 1979 - Die Suid-Afrikaanse ambassadeur in El Salvador, Eddie Dunn, word deur linkse terroriste ontvoer. Hy word later vermoor.
- 1987 - Die SAL-vliegtuig SAL Helderberg met 159 mense stort naby Mauritius in die Indiese Oseaan neer. Almal sterf in die grootste Suid-Afrikaanse vliegramp tot dusver.
- 1989 - Pres. F.W. de Klerk kondig aan dat die Nasionale Gesamentlike Bestuurstelsel binne die sekuriteitsopset afgeskaf word.
- 1992 - Twee paartjies word gedood en 17 mense beseer in ‘n aanval deur vyf gewapendes by â’n sosiale geleentheid op King Williamstown.
- 1999 - ‘n Pypbom ontplof in ‘n besige pizzarestaurant in Kampsbaai, Kaapstad, maar daar is geen lewensverlies nie. Minstens 46 mense word beseer.
- 2004 - Suid-Afrika kry die eerbewyse vir speler (Schalk Burger), afrigter (Jake White) en span (die Springbokke) by ‘n gala-aand van die Internasionale Rugbyraad.
